الخط ده خطي والكلمه دي ليا
غطي الورق غطي بالدمع ياعينيا
شط الزيتون شطي والأرض عربيه
نسايمها أنفاسي وترابها من ناسي
وأن كنت أنا ناسي ما هتنسنيش هي
الخط ده خطي والكلمه دي ليا
لأكتب علي عيني يحرم عليكي النوم
وأحبس ضياء عيني بدموعي طول اليوم
قبل الوفاء بديني زي الصلاه والصوم
بادن في عرف الحر هم ومذله ومر
وهموم تجيب وتذر أحزان مخبيه
الخط ده خطي والكلمه دي ليا
لأكتب علي كفي والحبر من دمي
ياعزوتي كفي ياهمتي ضمي
أول ما حنودي بالوعد حنسمي
بسم اللي ماتوا صغار في المدرسه والدار
والمصنع اللي أنهار فوق الصنايعيه
الخط ده خطي والكلمه دي ليا