انا اللى كنت بصلى واصوم
وراضى دايما بالمقسوم
جاني الشيطان لف عليا
سقانى كاس كان مسموم
واتارى نفسى الاماره
ودتنى باب الخماره
وقبل ما هرب او افكر
رص الشيطان نار وحجاره
والغابه لفت والجوزه
على النفوس المهزوزه
وقبل ما أسأل هشرب ايه؟
قالولى اشرب دى كازوزه
اعدل مزاجك هنا احسن
انسى المشاكل ولا تحزن
روحت بيتي اخر الليل
والفجر كان قرب ياذن
والكيف له حكم وله ذله
وكل ليله مع الشلة
وفي يوم وليله بقيت مديون
بقوت عيالي ياحول الله
والبسمه راحت والصحه
وانفاسي ضاقت من الحكه
ونهايتي بانت ومصيري
والكيف بغيري ياما ضحى
قالولي لونك بقا مخطوف
ولسا بكره ياما تشوف
والصحبه بعدت وسابوني
امد ايدي وانا مكسوف
غرقان في بحر وكلي ذنوب
عشمان يارب وناوي اتوب
قادر بعطفك تشفيني
وتنجي قلبي ودا المطلوب
وارجع اصلي ثاني واصوم
والبال يروق وماشيلش هموم
ونصرني دايما على نفسي
في دنيا فانيه ومش هتدوم
انا حقيقي انت كنت عصيت
خذني الشيطان ومعاه ضليت
راجع وقلبي بيتالم
ومن دمع عيني ياما بكيت
ندمان ياربي اقبل مني
على الشيطان والكيف عيني
وارجع لاهلي واحبابي
وناس عزاز كانوا بايعيني
والابن يرجع ثاني لابوه
والاخ يعرف قيمه اخوه
والفرحه ترجع لبلدنا
ولا حد فيها يارب يتوه
وتوبه..توبه..توبه