صدري الخالي
بعد مات قلبي القفص تم حلالي
اندير عزا في وسط صدري الخالي
درته ساحة وتما وسع واجد تقول بياحه
قلعته ودرت حديد في مطراحه
بارد شعوره إن مات ما له غالي
غيرت قفله وألتغى مفتاحه
ما يحس صنعة غرب يخدم الي
صدري الخالي
فرغ من همه لا عاد كبيرة ولا صغيرة اتهمه
لا عاد اتسكر لا اتسرح دمه
ولا عاد صمامه بيشغل بالي
بدت حالته بالضبط كيف الأمة
مريضة ومعلولة وتجبد تالي
ومتخلطات جميع قرنه وجمة
رياض بالفحل والذيب بيهن فالي
نبي نبث فيها الروح تعقد قمة
ترد قاعدة والذبح في اللي والي
واللي التهى اتاوب يشموا فمه
نعاود على نجعي خطيت مجالي
صدري الخالي
انديره أفراح بعد العزاء يبقى ضميري ارتاح
وندخل مكان قلبي عيون سماح
نرقص انغني يا قمر علالي
ويظل صدري سوق بالبراح
راسم وكل ليلية اندير احفالي
انخلط عصير العنب بالتفاح
وانشنهن بيش يهضمن لوكالي
ولا عاد نهتف لا انقل سلاح
عدوي حليفي والنفاق رأس مالي
نرفع شعار السلم لا الكفاح
ونزور تل ابيب رأسي عالي
صدري الخالي
انديره بار يضل يردحوا عندي كبار صغار
الشرب والرديح اليوم ما هو عار
ميزة و تطور في العصر الحالي
نعزم أصحابي انجيب جار الجار
عرب الكريم وما انغيب والي
وبالعكس نقلبها الليل نهار
في الرقبة سلاسل والحذاء قنبالي
ونا بشيشتي نبرم ايمين ايسار
اتقول غير مدوشن ايظل خيالي
زيادة بلاء ننزل على الأقمار
تقول غير طارح من يشوف اجلالي
ويضل الطبول يخش بالدولار
وانبدل هويتي ويتحسن حالي
نبقى حبايب نا والإستعمار
ننسى العراقي وأزمة الصومالي
اندير جو ونرافق إلا الكبار
سعادة وفخامة وفخفخة ومعالي
وإن همنا من خوف الإنفجار
ونمص ريقي وننتشي فنجالي
واللي يلومني بنقوله استثمار
الله ايعيني وهاذي أيام دلالي
ماشي وجاي انضل كي المنشار
انمزق سواريا وصوتي ايصالي
ونشرب عليها كأس لنفصال
الأمة اللي يلهد عليها الرفالي
صدري الخالي
وسع وبرودة بعد مات قلبي اندير ليلة سودة
في جذب حايل ويابس عوده
واللي كان نبته عود عوده بالي
وما عاد بالحيوان غير جلوده
لا سلم راح ولا في الحمادة فالي
لا طير جارح لا جحير اسيوده
اللي كان موكر صيد صيده جالي
كان غير لاجل الضحك فيه قرودة
وكلاب زينة وسرك للتسالي
لا نجع متطارح امروح زوده
لا صف عامر لا سبيب عيالي
لا شيخ نقب ايبرموا في جروده
وخاصة وريحية وجرد جبالي
ولا مرحبا بالضيف لا بالجودة
ويل كم ماي انكل بدل يا خالي
لا عيش لا بازين لا مترودة
لا عاد امقطع وجبة الزيوالي
ولا عاد غناوة ولا مجرودة
لا ظل عود ولا سريب اهلالي
لا برق يشكع لا سيول اجبوذه
الوادي اللي في رقبته النزالي
لا سيل جاري فرابطاته اسدوده
لا زرع مالي زرع لأم شمالي
لا وطن خطط الإنجليز احدوده
لا نفط جايبلي إلا القتالي
سلمت في الدقرة رفعت العودة
حتى نبي انميز اندير بغالي
نركب ونلهد ما نبي زغرودة
ولا من يفرّغ في حضور الوالي
ولا عاد مبروكة ولا مسعودة
وعين الغزال وشفته الفيلالي
انجيب بنت من رحمة الله مطرودة
لا تسال والديه ولا في خوالي
واللي بينهاني انسب اجدوده
يستاهل السبان ماله ومالي
صدري الخالي
اللي ايعزيني في موت قلبي اليوم خله ايجيني .. مرات زحمة ما يطول إيديني .. ايدز التعازي ويكتفي بنقالي
صدري الخالي
بعد مات قلبي .. القفص تم حلالي .. اندير عزا في وسط صدري الخالي